文/高天云

配音/丁婷婷

老早介里，辣上海乡下头讨“大娘子”（大妻小夫）蛮流行个，尤其辣浦东乡下头。

“大娘子”，就是老婆个岁数要比老公个大几岁。到底大几岁，迭个呒没个讲法，只要搿是父母之命，媒妁之言，八字相符就可以个。

葛末为啥喜欢讨“大娘子”，迭个也呒没个权威个讲法，猜想起来原因有：一来末女个要比男个懂得早，搿能对男人来讲，感觉告头既像老婆又像阿姐，比起岁数小个老婆来，大娘子更能关心搭仔体贴男人。二【ni】来末女个大几岁，事体懂得早一眼多一眼，做起事体来更有主见，搿就能成为屋里向个主心骨，拿屋里屋外弄得清清爽爽，顺顺当当。第三末应了“长嫂为母，长妻当姐”搿句老话，岁数比哥姐大个阿嫂，搿能就会像长辈一样待小叔、小姑，姑嫂道里向就勿会得勿开心、吵相骂，还能早晚孝敬公婆，讲起来讨“大娘子”勿知有几化好。

当然，乡下头个“大娘子”勿是老早介里有钞票、有身价人家个三妻四妾中个大老婆，伊跟“二十岁女子十岁郎，夜夜睏觉抱上床”个童养媳也是勿搭界个，一 般讲起来男人到了结婚个年龄，讨个女人岁数要比自家稍微大一些，告咾有个“女大三，屋脊坍”，“女大七，哭泣泣”个讲法。

老早介里浦东“大娘子”个口碑是蛮好个。搿是因为，老早介里浦东个男人侪出去做生意、学手艺，田里向、屋里向事体就侪落辣大娘子个身浪向。搿些大娘子侪是“手能绣、肩能挑”个好手，伊拉常庄忙个辰光辣地里向忙农活，闲个辰光豪燥孵辣屋里向忙女红，还要“灶前全家三餐、河边一盆衣洗”，屋里屋外各事体拍拍潽。大娘子确实无愧于一家之“大”，搿些“大娘子”侪是邪气“做人家”个。

解放后，颁布了新个《婚姻法》，规定了“男大女小”个结婚岁数，搿能一来乡下头讨“大娘子”就一眼眼少起来了，慢慢叫侪囥辣幺二角落里了。但搿两年有 些男人勿管岁数大小，伊拉又开始辣“姐弟恋”，讨“大娘子”又辣勿少地方出现了。老实讲：岁数大小不是老重要个，两家头好才是顶顶重要个，对伐。